|
Offensiv ordfører i Stranda kommune - men utbygging lar vente på seg
Lagt til av: Ole Kristoffer Hole Olsen | publisert: 28.06.2009
Ordførar Frank Sve vil gjere Strandafjellet skisenter om til eit kommunalt foretak. Han fremma sak om det over bordet i kommunestyret, men fleirtalet nekta å realitetshandsame saka.
Ordførar Frank Sve trakk forslaget om å realitetshandsame saka då han skjønte at han ikkje fekk det nødvendige totredels fleirtal. Han kallar dermed inn til nytt kommunestyremøtet 3. juli.
Det slo ned som ei lita bombe i kommunestyret då ordføraren fremja saka om at kommunen overtek heile skisenteret og står for utbygginga sjølv, ved å gjere aksjeselskapet om til eit kommunalt foretak. Kommunestyret vedtok i mai å gje ein lånegaranti på 49 millionar kroner til bygging av stolheis og andre fasilitetar på Fursetsida i skisenteret. Kommunen eig over halvparten av aksjane i selskapet. Sparebanken Møre og Stranda IL er blant dei andre aksjonærane.
Ordføraren argumenterte for at det er mindre risiko for kommunen å opprette eit kommunalt foretak, og slik ha full kontroll på utbygginga. Renteutgiftene blir også lågare på denne måten. Vidarer hastar det voldsomt å få bestilt stolheisane, og ordføraren ville ikkje vente lenger på at fylkesmannen si avgjerd på om lånegarantien blir godkjent. Frank Sve meiner fylkesmannen har brukt altfor lang tid.
Saksutgreiinga besto av eit notat frå ordføraren, og ei liten vurdering av notatet frå rådmannen, ved plan - og utviklingssjef Steinar Belsby.
Formannskapsmedlemmene vart gjort kjent med ordførarens ønskje måndag. For dei andre representantane, truleg med unntak av Frp-gruppa, kom forslaget som ei stor overrasking. Opposisjonen argumenterte kraftig for at dette var ei for stor og viktig sak til at den kunne handsamast over bordet, og Senterpartiets gruppeleiar gjorde det klart at ifølge kommunelova måtte det to tredjedels fleirtal til for å realitetshandsame saka.
Det skjønte ordføraren at han ikkje fekk, og trekte forslaget om realitetshandsaming. Istaden innkallar han til nytt kommunestyremøte fredag 3. juli, der saka skal handsamast. Fleire opposisjonsrepresentantar krevde ei grundigare saksutgreiing - gjort av administrasjonen - til det møtet.
kilde: sunnmøringen
|
